ആലപ്പുഴ: ചേർത്തലയിലെ വീട്ടമ്മയുടെ മരണത്തിൽ അസ്വഭാവിക മരണത്തിന് കേസെടുത്ത് പൊലീസ്. മകളുടെ പരാതിയിൽ ആണ് പോലീസ് കേസെടുത്തത്. അച്ഛന്റെ മർദനമേറ്റാണ് അമ്മയുടെ മരണമെന്ന് ആണ് മകൾ പൊലീസിൽ നൽകിയ പരാതി.
ആലപ്പുഴ മെഡിക്കൽ കോളേജ് ആശുപത്രിയിൽ ചികിത്സയിലിരിക്കെ ചേർത്തല മുട്ടം പണ്ടകശാല പറമ്പിൽ വിസി സജി (48) ഞായറാഴ്ചയാണ് മരിച്ചത്.സജിയുടെ ഭർത്താവ് സോണിക്കെതിരെയാണ് പരാതി. ജനുവരി എട്ടിന് രാത്രി സജിയെ ഭർത്താവ് സോണി മർദിക്കുകയും ഭിത്തിയിൽ തല ബലമായി ഇടിപ്പിക്കുകയും ചെയ്തുവെന്നാണ് പരാതിയിൽ പറയുന്നത്.
ഒരു മാസത്തോളം ആശുപത്രിയിൽ ചികിൽസയിലായിരുന്നു എന്നും പരാതിയിൽ പറയുന്നു. സോണിയെ ചോദ്യം ചെയ്ത ശേഷമാകും മറ്റുനടപടികളിലേക്ക് കടക്കുകയെന്ന് പൊലീസ് വ്യക്തമാക്കി.