അംറോഹ: മദ്യപിച്ച് ഫിറ്റായി യുവാവ് കാർ റെയിൽവേ ട്രാക്കിൽ കൊണ്ടിട്ട് യുവാവ്. ഉത്തർ പ്രദേശിലെ അംറോഹയിലാണ് സംഭവം. വെള്ളിയാഴ്ച വെളുപ്പിനെ മൂന്ന് മണിയോടെയാണ് സംഭവം. ട്രാക്കിലൂടെ അൻപത് മീറ്ററിലേറെ ദൂരമാണ് യുവാവ് എസ് യു വി ഓടിച്ചുകൊണ്ട് പോയത്. ഇതിന് പിന്നാലെ പാളത്തിൽ നിന്ന് കാർ തെന്നിമാറിയതോടെയാണ് കാർ കുടുങ്ങിയത്.
മദ്യപിച്ച് ലക്കുകെട്ടിരുന്ന യുവാവിനെ ഏറെ നിർബന്ധിച്ച ശേഷമാണ് കാറിൽ നിന്ന് ഇറക്കാനായത്. വേഗത കൂടിപ്പോയെന്നും റോഡ് സൈഡിലായിപ്പോയെന്നുമാണ് യുവാവ് രക്ഷാപ്രവർത്തനത്തിന് എത്തിയവരോട് പറഞ്ഞത്. കാർ നിൽക്കുന്നത് റെയിൽവേ ട്രാക്കിലാണെന്ന് ഏറെ പാടുപെട്ട് മനസിലാക്കിയ ശേഷമാണ് റെയിൽവേ പൊലീസിന് യുവാവിനെ കൈമാറിയത്. ഭിംപൂർ റെയിൽ വേ ഗേറ്റിന് സമീപത്തായിരുന്നു സംഭവം. മൊറാദാബാദിൽ നിന്ന് വന്ന ദമ്പതികളുടെ കാറാണ് ട്രാക്കിൽ കയറിയത്.