ഇന്ത്യൻ സമുദ്ര മേഖലയിലെ തന്ത്രപരമായ സുരക്ഷാ സമവാക്യങ്ങളെ പൂർണ്ണമായി മാറ്റിമറിക്കാൻ സാധ്യതയുള്ള പുതിയ നീക്കങ്ങളുമായി പാകിസ്ഥാൻ നാവികസേന രംഗത്തെത്തി. ചൈനയിൽ നിന്നും പുതുതായി വാങ്ങിയ അത്യാധുനിക ഹാംഗോർ ക്ലാസ് അന്തർവാഹിനികൾ ബംഗാൾ ഉൾക്കടലിൽ വിന്യസിക്കാനാണ് ഇസ്ലാമാബാദ് നിലവിൽ പദ്ധതിയിടുന്നത്. ചരിത്രപരമായ 1971-ലെ ഇന്ത്യ-പാക് യുദ്ധത്തിന് ശേഷം ആദ്യമായാണ് പാകിസ്ഥാൻ തങ്ങളുടെ നാവിക സാന്നിധ്യം ഈ മേഖലയിലേക്ക് വ്യാപിപ്പിക്കാൻ ഒരുങ്ങുന്നത്.
പാകിസ്ഥാൻ നാവികസേനയിലെ ഉന്നത ഉദ്യോഗസ്ഥനായ കൊമ്മോഡോർ ഒമർ ഫാറൂഖ് ആണ് ഈ തന്ത്രപരമായ പ്രതിരോധ നീക്കത്തെക്കുറിച്ചുള്ള വിവരങ്ങൾ പുറത്തുവിട്ടത്. ചൈനയിൽ നിന്നും കമ്മീഷൻ ചെയ്ത ആദ്യത്തെ പുതിയ അന്തർവാഹിനിയായ പിഎൻഎസ് ഹാംഗോർ കഴിഞ്ഞ ദിവസമാണ് കറാച്ചി തീരത്ത് എത്തിച്ചേർന്നത്. ഈ അത്യാധുനിക യുദ്ധക്കപ്പലുകളുടെ വരവോടെ ബംഗാൾ ഉൾക്കടൽ വരെയുള്ള സമുദ്ര മേഖലയിൽ കനത്ത നിരീക്ഷണം നടത്താൻ തങ്ങൾക്ക് സാധിക്കുമെന്ന് അദ്ദേഹം അവകാശപ്പെട്ടു.
ശ്രീലങ്കയിലെ കൊളംബോ തുറമുഖത്ത് വെച്ച് നടന്ന പ്രത്യേക നയതന്ത്ര കൂടിക്കാഴ്ചയിലാണ് ഈ സുപ്രധാന വെളിപ്പെടുത്തൽ ഉണ്ടായത്. ചൈനയുമായി ചേർന്ന് ആകെ എട്ട് ഹാംഗോർ ക്ലാസ് അന്തർവാഹിനികൾ നിർമ്മിക്കാനാണ് പാകിസ്ഥാൻ പ്രതിരോധ മന്ത്രാലയം ലക്ഷ്യമിടുന്നത്. പഴയ കാലഹരണപ്പെട്ട അഗോസ്റ്റ അന്തർവാഹിനികൾക്ക് പകരമായാണ് അന്താരാഷ്ട്ര സമുദ്ര സുരക്ഷയെ ഭീതിയിലാഴ്ത്തുന്ന ഈ പുതിയ യുദ്ധക്കപ്പലുകൾ നാവികസേനയുടെ ഭാഗമാക്കുന്നത്.
ബംഗാൾ ഉൾക്കടലിൽ പാകിസ്ഥാൻ തങ്ങളുടെ സ്വാധീനം വർദ്ധിപ്പിക്കാൻ ശ്രമിക്കുന്നത് ഇന്ത്യൻ പ്രതിരോധ ഏജൻസികൾ അതീവ ഗാഗ്രതയോടെയാണ് നിരീക്ഷിക്കുന്നത്. ഭാരതത്തിന്റെ സുരക്ഷയ്ക്ക് ഏറ്റവും പ്രധാനപ്പെട്ട ഈ സമുദ്ര മേഖലയിൽ പാകിസ്ഥാൻ കടന്നുകയറാൻ ശ്രമിക്കുന്നത് കടുത്ത വെല്ലുവിളിയാണ് ഉയർത്തുന്നത്. പ്രത്യേകിച്ചും ആൻഡമാൻ നിക്കോബാർ ദ്വീപുകൾക്ക് സമീപമുള്ള തന്ത്രപരമായ ഇന്ത്യൻ നാവിക താവളങ്ങൾക്ക് ഇത് പുതിയ പ്രതിരോധ തലവേദനകൾ സൃഷ്ടിച്ചേക്കാം.
ബംഗ്ലാദേശിൽ അടുത്തിടെയുണ്ടായ രാഷ്ട്രീയ അട്ടിമറികളും തുടർന്നുണ്ടായ പുതിയ ഭരണമാറ്റവുമാണ് പാകിസ്ഥാന് ഈ പ്രദേശത്ത് പുതിയ അനുകൂല സാഹചര്യം ഒരുക്കിയത്. വർഷങ്ങളായി അകന്നു കഴിഞ്ഞിരുന്ന ഇസ്ലാമാബാദും ധാക്കയും തമ്മിൽ സൈനിക നയതന്ത്ര ബന്ധങ്ങൾ വൻതോതിൽ ശക്തമാക്കി വരികയാണ്. കഴിഞ്ഞ നവംബറിൽ പാകിസ്ഥാന്റെ ഒരു വലിയ യുദ്ധക്കപ്പൽ ചരിത്രത്തിലാദ്യമായി ബംഗ്ലാദേശ് തുറമുഖത്ത് വിജയകരമായി അടുപ്പിച്ചിരുന്നു.
ആണവായുധങ്ങൾ വഹിക്കാൻ ശേഷിയുള്ളതാണ് ചൈന നിർമ്മിത ഹാംഗോർ അന്തർവാഹിനികൾ എന്നാണ് ആഗോള സുരക്ഷാ വിദഗ്ദ്ധർ വിലയിരുത്തുന്നത്. ഇന്ത്യൻ പ്രതിരോധ വ്യൂഹത്തെ വെല്ലുവിളിക്കാൻ ചൈന തങ്ങളുടെ സഖ്യകക്ഷിയായ പാകിസ്ഥാനെ മുൻനിർത്തി നടത്തുന്ന ഈ പരോക്ഷമായ നീക്കങ്ങൾ ഏഷ്യൻ പസഫിക് സമുദ്ര മേഖലയിൽ വൻ അസ്ഥിരതയ്ക്ക് കാരണമാകും. വരും ദിവസങ്ങളിൽ ഇന്ത്യൻ നാവികസേന ഇതിനെ പ്രതിരോധിക്കാൻ ബംഗാൾ ഉൾക്കടലിൽ കൂടുതൽ കപ്പലുകൾ വിന്യസിച്ചേക്കും.