മലയാളികളുടെ ജീവിതത്തില് സ്വര്ണം എന്നും ഒരു സുരക്ഷിത നിക്ഷേപമായി നിലനിന്നതാണ്. ഒരിക്കല് അടിയന്തര സാഹചര്യങ്ങളില് സ്വര്ണം വിറ്റ് പ്രശ്നങ്ങള് പരിഹരിക്കുന്നത് ഒരു പതിവ് ആണ്. എന്നാല് ഇപ്പോഴത്തെ സാഹചര്യത്തില് ആ സമീപനം മാറിയിരിക്കുകയാണ്. സ്വർണം കൈവിടാതെ തന്നെ പണം കണ്ടെത്താനുള്ള മാര്ഗമായി സ്വര്ണപ്പണയം കൂടുതല് ആളുകള് സ്വീകരിക്കുന്നു എന്നാണ് ഇപ്പോൾ പുറത്തു വരുന്ന വിവരം.
ഇതിന് പിന്നിലെ പ്രധാന കാര്യം അതിന്റെ എളുപ്പവും വേഗവുമാണ്. മറ്റ് വായ്പകളെ അപേക്ഷിച്ച് അധിക രേഖാപ്രക്രിയകളൊന്നും ഇല്ലാതെ, കൈവശമുള്ള സ്വര്ണം പണയം വെച്ച് വളരെ ചുരുങ്ങിയ സമയത്തിനുള്ളില് പണം ലഭിക്കും. പലപ്പോഴും ബാങ്കുകളിലും സ്വര്ണവായ്പ സ്ഥാപനങ്ങളിലും മണിക്കൂറുകള്ക്കുള്ളില് തന്നെ തുക ലഭ്യമാകുന്നത് വലിയ സൗകര്യമാണ്. കൂടാതെ, പലിശനിരക്കും സാധാരണ പേഴ്സണല് ലോണുകളേക്കാള് കുറവായിരിക്കും.
മുന്പ് അത്യാവശ്യമായ സാഹചര്യങ്ങളില് മാത്രം സ്വര്ണം ഉപയോഗിച്ചിരുന്നവര് ഇന്ന് അത് ഒരു സാമ്പത്തിക ഉപാധിയായി കാണുന്നു. നിക്ഷേപങ്ങള് നഷ്ടത്തില് വിറ്റഴിക്കേണ്ടി വരാതിരിക്കാനും സ്വര്ണപ്പണയം സഹായകമാണ്. പ്രത്യേകിച്ച് ഓഹരി വിപണിയോ മ്യൂച്വല് ഫണ്ടുകളോ താഴോട്ടായിരിക്കുമ്പോള് പണം ആവശ്യമുണ്ടെങ്കില്, അവ പിന്വലിക്കുന്നതിന് പകരം സ്വര്ണം ഉപയോഗിക്കുന്നത് നഷ്ടം കുറയ്ക്കാന് സഹായിക്കും.
അതേസമയം, ഈ സൗകര്യം ഉപയോഗിക്കുമ്പോള് ചില കാര്യങ്ങള് ശ്രദ്ധിക്കേണ്ടതുണ്ട്. നിശ്ചിത സമയത്തിനുള്ളില് വായ്പ തിരിച്ചടയ്ക്കാന് കഴിയില്ലെങ്കില് സ്വര്ണം ലേലത്തിന് പോകും. അതിനാല് എത്രയും പെട്ടെന്ന് തിരിച്ചടയ്ക്കാനാകുന്ന സാഹചര്യങ്ങളില് മാത്രമേ സ്വര്ണപ്പണയം തിരഞ്ഞെടുക്കുന്നത് നല്ലത്.
ചുരുക്കത്തില്, പെട്ടെന്നുള്ള സാമ്പത്തിക ആവശ്യങ്ങള് നിറവേറ്റാന് സ്വര്ണപ്പണയം ഒരു പ്രായോഗിക മാര്ഗമായി മാറിയിരിക്കുകയാണ്. എന്നാല് ഉത്തരവാദിത്തത്തോടെ ഉപയോഗിച്ചാല് മാത്രമേ ഇത് യഥാര്ഥത്തില് ഗുണകരമാകൂ.