പാലക്കാട് കണ്ണാടി സ്കൂളിലെ വിദ്യാർത്ഥിയായ അർജുന്റെ ആത്മഹത്യയുമായി ബന്ധപ്പെട്ട് സംസ്ഥാനത്തെ വിദ്യാഭ്യാസ സ്ഥാപനങ്ങളിലെ അന്തരീക്ഷത്തെ രൂക്ഷമായി വിമർശിച്ച് കെ.എസ്.യു. സംസ്ഥാന പ്രസിഡന്റ് അലോഷ്യസ് സേവ്യർ രംഗത്തെത്തി. ചില അധ്യാപകർ വിദ്യാർത്ഥികളോട് പെരുമാറുന്നത് ‘നാസി പടയാളികളെപ്പോലെ’ ആണെന്നും, കലാലയങ്ങളെ ഒരു കാരണവശാലും ‘കോൺസൻട്രേഷൻ ക്യാമ്പുകളാക്കി’ മാറ്റരുതെന്നും അദ്ദേഹം ഫേസ്ബുക്ക് കുറിപ്പിലൂടെ ആവശ്യപ്പെട്ടു.
വിദ്യാർത്ഥികളെ ചേർത്തുപിടിക്കുന്ന നിരവധി നല്ല അധ്യാപകർക്ക് അപമാനകരമാണ് ഈ മോശം പ്രവണത എന്നും കെ.എസ്.യു. ചൂണ്ടിക്കാട്ടുന്നു. നിലവിലെ സാഹചര്യത്തിൽ, വിദ്യാർത്ഥികൾ ‘പ്രഷർ കുക്കറിന് സമാനമായി’ കടുത്ത മാനസിക സമ്മർദ്ദവും ആഘാതവുമാണ് നേരിടുന്നത്. തങ്ങളുടെ ആത്മസംഘർഷങ്ങൾ തുറന്നുപറയാനോ പരിഹാരം കണ്ടെത്താനോ സാധിക്കാതെ വീർപ്പുമുട്ടുന്ന കുട്ടികളുടെ പട്ടികയിലാണ് അർജുനും ഇടം നേടിയിരിക്കുന്നത്. ഈ പ്രതിസന്ധി ഘട്ടങ്ങളെ വേണ്ടവിധം അഭിസംബോധന ചെയ്യുന്നതിൽ ഭരണകൂടവും പൊതുസമൂഹവും പരാജയപ്പെടുന്നു എന്നും അലോഷ്യസ് സേവ്യർ കുറ്റപ്പെടുത്തി. കേവലം അനുശോചന കുറിപ്പുകളോ ‘ജസ്റ്റിസ് ഫോർ’ കാമ്പയിനുകളോ അല്ല, മറിച്ച് ഒരു തലമുറയെ രക്ഷിക്കാൻ ഉതകുന്ന ക്രിയാത്മകമായ, പ്രായോഗിക നടപടികളാണ് ആവശ്യം എന്നും അദ്ദേഹം അടിവരയിട്ടു പറഞ്ഞു.
അർജുന്റെ മരണത്തിലേക്ക് നയിച്ച സംഭവങ്ങളുടെ തുടക്കം വെള്ളിയാഴ്ച വൈകുന്നേരമാണ്. ഇൻസ്റ്റഗ്രാമിൽ സന്ദേശങ്ങൾ കൈമാറിയ അർജുൻ ഉൾപ്പെടെയുള്ള നാല് വിദ്യാർത്ഥികളുടെ വിവരം ഒരു രക്ഷിതാവ് സ്കൂൾ അധികൃതരെ അറിയിച്ചു. ഇതിനെത്തുടർന്ന് മുഴുവൻ രക്ഷിതാക്കളെയും സ്കൂളിലേക്ക് വിളിപ്പിക്കുകയും കുട്ടികളെ ശാസിക്കുകയും ചെയ്തു.
പിന്നീട് ക്ലാസ് അധ്യാപികയായ ആശ സമാനമായ വിഷയത്തിൽ വിദ്യാർത്ഥികളോട് ഇടപെടുകയും ഭീഷണിപ്പെടുത്തുകയും ചെയ്തു എന്നാണ് കുട്ടികളുടെ ആരോപണം. ക്ലാസ് മുറിയിൽ വെച്ച് അധ്യാപിക സൈബർ സെല്ലിനെ വിളിച്ചതായി ഭീഷണി മുഴക്കുകയും, കുട്ടികൾക്ക് ‘ജയിൽ ശിക്ഷ’ ലഭിക്കാൻ സാധ്യതയുണ്ടെന്ന് പറയുകയും ചെയ്തുവെന്ന് അർജുന്റെ സഹപാഠി വെളിപ്പെടുത്തിയിരുന്നു. ഈ സംഭവത്തിന് ശേഷം അർജുൻ കടുത്ത അസ്വസ്ഥതയിലായി. സ്കൂളിൽ നിന്നും പോകുമ്പോൾ മരിക്കുമെന്ന് പറഞ്ഞ് തന്നെ കെട്ടിപ്പിടിച്ച് കരഞ്ഞതായും സഹപാഠി മൊഴി നൽകിയിട്ടുണ്ട്.
ക്ലാസ് അധ്യാപിക അർജുനെ നിരന്തരം മാനസികമായി പീഡിപ്പിച്ചിരുന്നുവെന്ന് കുടുംബാംഗങ്ങളും ആരോപിച്ചിരുന്നു. എന്നാൽ കുട്ടി ആത്മഹത്യ ചെയ്യാൻ തക്കതായ ഒരു കാരണവും സ്കൂളിന്റെ ഭാഗത്ത് നിന്നുണ്ടായിട്ടില്ല എന്നായിരുന്നു ആദ്യഘട്ടത്തിൽ അധ്യാപകരുടെ നിലപാട്. ഇതിൽ പ്രതിഷേധിച്ച് വിദ്യാർത്ഥികൾ ക്ലാസുകൾ ബഹിഷ്കരിച്ച് സ്കൂളിൽ പ്രതിഷേധ സമരം നടത്തി. പ്രധാനാധ്യാപിക ലിസി തങ്ങളുടെ അധ്യാപകർക്ക് പിഴവ് പറ്റിയിട്ടില്ല എന്ന നിലപാടിൽ ഉറച്ചുനിന്നതോടെ പ്രതിഷേധം കൂടുതൽ ശക്തമായി.
ഇതിനെ തുടർന്ന് വിദ്യാഭ്യാസ വകുപ്പ് ഉദ്യോഗസ്ഥരും സ്കൂൾ മാനേജ്മെന്റും അടിയന്തര യോഗം ചേരുകയും, ആരോപണവിധേയരായ ക്ലാസ് അധ്യാപിക ആശ, പ്രധാനാധ്യാപിക ലിസി എന്നിവരെ അന്വേഷണ വിധേയമായി സസ്പെൻഡ് ചെയ്യുകയും ചെയ്തു. പൊലീസ് സംഭവത്തിൽ കേസെടുത്ത് അന്വേഷണം ആരംഭിച്ചു. കൂടാതെ, അധ്യാപകർക്കെതിരെ വകുപ്പുതല അന്വേഷണം തുടരാനാണ് വിദ്യാഭ്യാസ വകുപ്പിന്റെ തീരുമാനം. ശക്തമായ പ്രതിഷേധങ്ങളുടെ പശ്ചാത്തലത്തിൽ കണ്ണാടി ഹയർ സെക്കൻഡറി സ്കൂൾ നാല് ദിവസത്തേക്ക് അടച്ചിട്ടു.