തിരുവനന്തപുരം: മതപരിവര്ത്തനവും മനുഷ്യക്കടത്തും ആരോപിച്ച് ഛത്തീസ്ഗഡില് മലയാളികളായ കന്യാസ്ത്രീകളെ അറസ്റ്റ് ചെയ്ത സംഭവത്തില് ഇടപെടണമെന്നാവശ്യപ്പെട്ട് പ്രധാനമന്ത്രിക്ക് കത്തയച്ച് മുഖ്യമന്ത്രി പിണറായി വിജയന്. അറസ്റ്റുചെയ്യപ്പെട്ട കന്യാസ്ത്രീകള്ക്ക് നീതി ലഭ്യമാക്കണമെന്ന് കത്തില് മുഖ്യമന്ത്രി ആവശ്യപ്പെട്ടു.
അറസ്റ്റ് ചെയ്ത കന്യാസ്ത്രീകള്ക്ക് നീതി ലഭ്യമാക്കാന് പ്രധാനമന്ത്രി വിഷയത്തില് നേരിട്ട് ഇടപെടണം. കന്യാസ്ത്രീകളുടെ ബന്ധുക്കള് പരാതിയുമായി സമീപിച്ചെന്നും മുഖ്യമന്ത്രി കത്തില് ചൂണ്ടിക്കാട്ടി. സംഭവത്തില് സുതാര്യവും നീതിയുക്തവുമായ നടപടി ഉറപ്പാക്കണം എന്നും പ്രധാനമന്ത്രിക്ക് അയച്ച കത്തില് മുഖ്യമന്ത്രി അഭ്യാര്ഥിച്ചു.
വന്ദന ഫ്രാന്സിസ്, പ്രീതി മേരി എന്നിവരെയാണ് ഛത്തീസ്ഗഡിലെ ദുര്ഗ് റെയില്വേ സ്റ്റേഷനില് വച്ച് റയില്വേ പൊലീസ് വെള്ളിയാഴ്ച അറസ്റ്റ് ചെയ്തത്. സഭയുടെ കീഴിലെ സ്ഥാപനങ്ങളിലേക്ക് മൂന്ന് പെണ്കുട്ടികളെ കൊണ്ടുപോകാന് ശ്രമിക്കുന്നതിനിടെയാണ് അറസ്റ്റ് എന്നാണ് വിവരം.
നിര്ബന്ധിത മതപരിവര്ത്തനവും മനുഷ്യക്കടത്തും ആരോപിച്ച് ബജ്റംഗ്ദള് പ്രവര്ത്തകര് റെയില്വേ സ്റ്റേഷനില് പ്രതിഷേധമുയര്ത്തിയതിന് പിന്നാലെയാണ് റെയില്വേ പൊലീസ് അറസ്റ്റ് രേഖപ്പെടുത്തിയത്.