2018 , ഐഡന്റിറ്റി, കടുവ, സാറാസ് എന്നീ ചിത്രങ്ങളിലൂടെ ശ്രദ്ധ നേടിയ ബാല താരമാണ് വൃദ്ധി വിശാൽ. സോഷ്യൽ മീഡിയകളിൽ ഡാൻസ് റീലുകളിലൂടെയും മലയാളികൾക്ക് സുപരിചിതയാണ് ഈ കൊച്ചു മിടുക്കി.
കാടിന്റെ പശ്ചാത്തലത്തിൽ ഒരുങ്ങുന്ന ഹ്രസ്വ ചിത്രമാണ് അടവി. ഇതിന്റെ ഫസ്റ്റ് ലുക്ക് പോസ്റ്റർ നേരത്തെ പുറത്തു വിട്ടിരുന്നു.വൃദ്ധിയുടെ പിറന്നാൾ ദിവസമായ ഇന്ന് അണിയറക്കാർ വൃദ്ധി ചിത്രത്തിൽ ഉണ്ടെന്ന പോസ്റ്റർ പുറത്തു വിട്ടിട്ടുണ്ട് .
അടവി എന്ന പേരിന്റെ അർത്ഥം കാട് എന്നാണ്. പ്രകൃതിയുടെ ഭീതിജനകമായ വശം മാത്രമേ എല്ലാവർക്കും അറിയൂ, എന്നാൽ മാതൃസഹജമായൊരു കരുതലും കൂടിയുണ്ട്. അതേക്കുറിച്ച് പലർക്കും അറിയില്ല. എന്നും വിസ്മയിപ്പിച്ചിട്ടുള്ള കാടാകുന്ന മാന്ത്രിക പ്രപഞ്ചം അത് നമുക്ക് കാണിച്ച് തരും. അതാണ് അടവിയുടെ പ്രമേയം.
അഞ്ച് ഭാഷകളിലായാണ് അടവി ഒരുങ്ങുന്നത്. മലയാളം കൂടാതെ തമിഴിലെയും കന്നഡയിലെയും തെലുങ്കിലെയും ഹിന്ദിയിലെയും പോസ്റ്റർ ഒന്നിച്ചാണ് റിലീസ് ചെയ്തത്.
കുളിസീൻ, മറ്റൊരു കടവിൽ എന്നീ ഹിറ്റ് ഷോർട്ട്ഫിലിമുകൾ സംവിധാനം ചെയ്ത രാഹുൽ കെ ഷാജിയാണ് അടവി സംവിധാനം ചെയ്തിട്ടുള്ളത്. കൈലാസം ഡ്രീംവർക്സിന്റെ ബാനറിൽ അമൽ ഗോപാലകൃഷ്ണനാണ് നിർമ്മാണം. രാഹുൽ രാജ് ആണ് സംഗീതം ഒരുക്കുന്നത്. അഭിനയത്തിലൂടെ പ്രിയങ്കരനായ അഹമ്മദ് സിദ്ധിഖ് ആണ് കഥയും തിരക്കഥയും സംഭാഷണവും ഒരുക്കിയിരിക്കുന്നത്.
എഡിറ്റർ ബിലഹരി ,രാജേഷ് സുബ്രമണ്യമാണ് ഛായാഗ്രാഹകൻ. പോസ്റ്റർ ഒരുക്കിയത് സുജിത് ഡിസൈൻസാണ്. ക്രിയേറ്റിവ് സപ്പോർട്ട് : നകുൽ കെ ഷാജി, നന്ദു നന്ദൻ, അനൂപ് സുകുമാരൻ, സുന്ദർലാൽ തിരുവേഗപ്പുറ, വൈൽഡ് ലൈഫ് സിനിമാട്ടോഗ്രഫി കൺസൽറ്റന്റ് ആമിർ വിസ് , ജീന അനൂപ് , പ്രൊഡക്ഷൻ കൺട്രോളർ പ്രശോഭ് കെ വി ,സ്റ്റീൽസ് :ജിഷ്ണു കൈലാസ്.