ലണ്ടന്: ഇന്ത്യയ്ക്ക് അഭിമാനമായി, കന്നഡ എഴുത്തുകാരി ബാനു മുഷ്താഖിന് അന്താരാഷ്ട്ര ബുക്കര് സമ്മാനം. ദക്ഷിണേഷ്യയിലെ മുസ്ലീം സമുദായത്തെ പശ്ചാത്തലമാക്കിയുള്ള ‘ഹാര്ട്ട് ലാംപ്’ എന്ന കഥാസമാഹാരമാണ് ബാനുവിനെ സമ്മാനാര്ഹ ആക്കിയത്. കന്നഡയിലെഴുതിയ കഥകളുടെ ഇംഗ്ലീഷ് പരിഭാഷ നടത്തിയത് ദീപാ ഭസ്തിയാണ്. ഇന്ത്യയില് നിന്ന് ചുരുക്കപട്ടികയിലിടം നേടിയ ഏക പുസ്തകമാണിത്.
സമ്മാനത്തുകയായ അരലക്ഷം പൗണ്ട്(ഏകദേശം 53 ലക്ഷം രൂപ) സാഹിത്യകാരിയും പരിഭാഷകയും പങ്കിടും. 1990-2003 കാലത്തിനുള്ളില് ബാനു എഴുതി പ്രസിദ്ധീകരിച്ച കഥകളില് നിന്നും തിരഞ്ഞെടുത്ത കഥകളാണ് ഹാര്ട്ട് ലാംപിലുള്ളത്. ആത്മകഥാംശമുള്ള കഥകള് സ്ത്രീ അനുഭവങ്ങളുടെ നേര്സാക്ഷ്യമാണ്.
മറ്റ് ഭാഷകളില് നിന്ന് ഇംഗ്ലീഷിലേക്ക് മൊഴിമാറ്റം ചെയ്ത് ബ്രിട്ടനിലും അയല്ലന്ഡിലും പ്രസിദ്ധീകരിക്കുന്ന നോവലുകള്ക്കാണ് അന്താരാഷ്ട്ര ബുക്കര് സമ്മാനം നല്കുന്നത്. വൈവിധ്യങ്ങളെ ആഘോഷിക്കാനും എല്ലാ ശബ്ദങ്ങളെയും സ്വീകരിക്കാനും കഴിയുന്ന ഒരു ലോകമുണ്ടായതില് സന്തോഷവതിയാണെന്ന് ബാനു മുഷ്താഖ് പറഞ്ഞു.