കോഴഞ്ചേരി: ദക്ഷിണേന്ത്യയിലെ ഏറ്റവും വലിയ ഹിന്ദുമത സമ്മേളനം പമ്പ മണപ്പുറത്ത് നടക്കുമ്പോൾ പുണ്യനദിക്ക് ആരതി സമർപ്പിച്ച് ഭക്തർ. അയിരൂർ ചെറുകോൽപ്പുഴ ഹിന്ദുമത പരിഷത്ത് ഹിന്ദു ഏകത സമ്മേളനത്തിന്റെ മുന്നോടിയായിട്ടായിരുന്നു ആരതി സമർപ്പണം. പമ്പ മുതൽ പല്ലനവരെയുള്ള 113 നദീ തീരങ്ങളിൽ ആരതിയും പൂജയും നടന്നു.
ഫെബ്രുവരി 2 മുതൽ 9 വരെയാണ് അയിരൂർ – ചെറുകോൽപ്പുഴ ഹിന്ദുമത പരിഷത്ത്. ഇതിന്റെ ഭാഗമായി ഫെബ്രുവരി അഞ്ചിന് ഹിന്ദു ഏകത സമ്മേളനം നടക്കും. ആർഎസ്എസ് സർസംഘചാലക് ഡോ. മോഹൻ ഭാഗവത് പങ്കെടുക്കുന്ന ഹിന്ദു ഏകത സമ്മേളനത്തിന് മുന്നോടിയായുള്ള ചടങ്ങുകളിൽ ഒന്നാണ് പമ്പ ആരതി.
പമ്പാനദി ഒഴുകുന്ന പത്തനംതിട്ട, ആലപ്പുഴ ജില്ലകളിലെ വിവിധ തീരങ്ങളിലായിരുന്നു
നാമമന്ത്രങ്ങളോടെ ചടങ്ങുകൾ നടത്തിയത്. പല്ലന കെവി ജെട്ടിയിൽ നടന്ന ആരതിക്ക് സ്വാമി സുരേശ്വരാനന്ദ സരസ്വതി ദീപ പ്രോജ്വലനം നിർവഹിച്ചു. ക്രൈസ്റ്റ് നമ്പൂതിരി ആരതി പൂജ നടത്തി . ഹിന്ദു ഏകത സമ്മേളനത്തിന്റെ ഭാഗമായി വരും വർഷങ്ങളിലും പമ്പ ആരതി നടത്തും.
സന്യാസ ശ്രേഷ്ഠർ, ആധ്യാത്മിക സാംസ്കാരിക രംഗത്തെ പ്രമുഖർ തുടങ്ങിയവരുടെ സാന്നിധ്യം ചടങ്ങിനെ ധന്യമാക്കി. കോഴഞ്ചേരി മേലുകര പള്ളിയോട കടവിൽ നടന്ന ആരതിക്ക് ഫൊക്കാനോ സംഘടനാ ഭാരവാഹി ശശിധരൻ നായർ പ്രോജ്വലനം നിർവഹിച്ചു. മാവേലിക്കര വിദ്യാധിരാജ സ്കൂൾ പ്രിൻസിപ്പൽ ഡോ സന്തോഷ് കുമാർ നദീ സംരക്ഷണ സന്ദേശം നൽകി. ഹിന്ദു ഏകതാ സമ്മേളനം ഭാരവാഹികൾ വിവിധ ഇടങ്ങളിൽ നടന്ന ചടങ്ങുകൾക്ക് നേതൃത്വം നൽകി. വൃക്ഷത്തൈ വിതരണം, ഹിന്ദു നേതൃയോഗം തുടങ്ങിയ പരിപാടികൾ ഹിന്ദു ഏകതാ സമ്മേളനത്തിന്റെ ഭാഗമായി വരും ദിവസങ്ങളിൽ നടക്കും .