മുംബൈ: ഐപിഎൽ ട്വന്‍റി-20 ക്രിക്കറ്റിൽ ലക്നോ സൂപ്പർ ജയ്ന്‍റ്സിനെതിരെ മുംബൈ ഇന്ത്യൻസിന് 200 റണ്‍സ് വിജയലക്ഷ്യം. നായകൻ കെ.എൽ. രാഹുലിന്‍റെ സെഞ്ചുറി പ്രകടനമാണ് ലക്നോവിനെ മികച്ച നിലയിലെത്തിച്ചത്. ടോസ് നഷ്ടപ്പെട്ട് ആദ്യം ബാറ്റ് ചെയ്ത ലക്നോ നിശ്ചിത 20 ഓവറിൽ നാല് വിക്കറ്റ് നഷ്ടത്തിൽ 199 റണ്‍സെടുത്തു.
നായകന്‍റെ കരുത്ത് തെളിയിക്കുന്ന പ്രടനമാണ് രാഹുൽ കാഴ്ചവച്ചത്. 60 പന്തിൽ അഞ്ച് സിക്സും ഒൻപത് ഫോറും ഉൾപ്പെടെ 103 റണ്‍സുമായി രാഹുൽ വിക്കറ്റ് നഷ്ടപ്പെടുത്താതെ ക്രിസീൽ ഉറച്ചു നിന്നു. രാഹുലിന് ഡി കോക്കും മനീഷ് പാണ്ഡെയും ഉറച്ച പിന്തുണ നൽകിയതോടെ ടീം സ്കോർ ഇരുന്നൂറിനരികിലേക്ക് ഉയർന്നു.
ഡി കോക്ക് 13 പന്തിൽ 24 റണ്‍സും മനീഷ് പാണ്ഡെ 29 പന്തിൽ 38 റണ്‍സും നേടി. മാർക്കസ് സ്റ്റോയിന്സ് 10ഉം ദീപക് ഹൂഡ 15 റണ്‍സും നേടി. മുംബൈയ്ക്കായി ജയദേവ് ഉനദ്കട്ട് രണ്ട് വിക്കറ്റ് നേടി.
