കോട്ടയം: കോട്ടയം മുള്ളന്‍കുഴിയില്‍ ജപ്തി ചെയ്ത വീട് തുറന്നു കൊടുക്കാമെന്ന് ബാങ്ക് അധികൃതര്‍. ബാങ്ക് വീട് ജപ്തി ചെയ്തതോടെ 13 ദിവസമായി വീട്ടുവരാന്തയില്‍ കഴിയുകയായിരുന്നു മുള്ളന്‍കുഴിയിലെ ശകുന്തളവും കുടുംബവും.
തിരുവഞ്ചൂര്‍ രാധാകൃഷ്ണന്‍ എംഎല്‍എ ഇടപെട്ടതോടെയാണ് വീട് തുറന്നു നല്‍കാമെന്ന് അധികൃതര്‍ അറിയിച്ചത്. വായ്പ തിരിച്ചടയ്ക്കാന്‍ സാവകാശം നല്‍കാമെന്നും അധികൃതര്‍ അറിയിച്ചു.
സര്‍ഫാസി ആക്റ്റ് പ്രകാരം ആക്‌സിസ് ബാങ്കാണ് വീട് ജപ്തി ചെയ്തത്. ഭവനവായ്പ്പ എടുത്ത ആറു ലക്ഷം തിരിച്ച് അടയ്ക്കാത്തതിനാലാണ് നടപടി. 2016ലാണ് ഭവനവായ്പയായി ആറ് ലക്ഷം രൂപയെടുത്തത്. 2018 വരെ 90,000 രൂപ തിരികെ അടച്ചു.
പീന്നീട് പ്രളയവും കൊവിഡ് പ്രതിസന്ധിയും മൂലം ബാക്കി തുക അടയ്ക്കാന്‍ കഴിഞ്ഞില്ല. വീട് വിറ്റ് പണം അടയ്ക്കാമെന്ന് പറഞ്ഞിട്ടും ബാങ്ക് സാവകാശം തന്നില്ലെന്ന് വീട്ടുകാര്‍ ആരോപിച്ചു.
