പെരിന്തൽമണ്ണ: മലപ്പുറത്ത് നവവധു വാഹനാപകടത്തിൽ മരിച്ചു. പാണമ്പി ഇഎംഎസ് നഴ്സിങ് കോളജിനു സമീപം പുളിക്കൽ നജ്മുദ്ദീന്റെ മകൾ നേഹ (22)യാണ് മരിച്ചത്. പൂക്കോട്ടൂർ അറവങ്കര സ്വദേശി അസ്ഹർ ഫാസിലുമായുള്ള നിക്കാഹ് കഴിഞ്ഞ് ഒരാഴ്ച്ച തികയും മുമ്പാണ് യുവതിയുടെ മരണം. വെള്ളിയാഴ്ച ഉച്ചയ്ക്കു രണ്ട് മണിയോടെയാണ് അപകടമുണ്ടായത്. ഭർത്താവിനൊപ്പം സ്കൂട്ടറിൽ സഞ്ചരിക്കുന്നതിനിടെ കോഴിക്കോട്–പാലക്കാട് ദേശീയ പാതയിൽ ജൂബിലി ജംക്ഷനു സമീപത്തുവച്ച് ക്രെയിൻ ഇടിച്ചുണ്ടായ അപകടത്തിലാണ് യുവതി മരിച്ചത്.
അൽശിഫ നഴ്സിങ് കോളജിൽ ബിഎസ്സി നഴ്സിങ് അവസാന വർഷ വിദ്യാർഥിനിയാണ് നേഹ. ഈ മാസം ഒന്നിനായിരുന്നു നേഹയും അസ്ഹർ ഫാസിലുമായി നിക്കാഹ് കഴിഞ്ഞത്. അസ്ഹറിനൊപ്പം യാത്ര ചെയ്യുമ്പോൾ പിന്നിൽനിന്നെത്തിയ ക്രെയിൻ ഇടിച്ചു വീഴ്ത്തുകയായിരുന്നു. പെരിന്തൽമണ്ണയിലെ സ്വകാര്യ ആശുപത്രിയിൽ എത്തിച്ചെങ്കിലും രക്ഷിക്കാനായില്ല. മൃതദേഹം ഇന്നു ജില്ലാ ആശുപത്രിയിൽ പോസ്റ്റ്മോർട്ടത്തിനു ശേഷം അമ്മിനിക്കാട് വെസ്റ്റ് ജുമാ മസ്ജിദിൽ കബറടക്കും. മാതാവ്: ഫളീല. സഹോദരങ്ങൾ: നിയ, സിയ.
