മുംബൈ-അഹമ്മദബാദ് ബുള്ളറ്റ് ട്രെയിൻ പദ്ധതിയിൽ നിർണ്ണായക പുരോഗതി. നവസാരി ജില്ലയിലെ ഖരേര നദിക്ക് കുറുകെയുള്ള പാലം പൂർത്തിയായി. ആകെ 20 നദികൾക്ക് കുറുകയാണ് പാലങ്ങൾ നിർമിക്കുന്നത്. ഇതിൽ വാപിക്കും സൂറത്തിനും ഇടയിലുള്ള 9 പാലങ്ങളാണ് പൂർത്തിയായത്. ഖരേര പാലത്തിന് 120 മീറ്ററാണ് നീളം. 40 മീറ്റർ വീതമുള്ള മൂന്ന് ഫുൾ സ്പാൻ ഗർഡറുകൾ ഉപയോഗിച്ചാണ് ഇവ നിർമിച്ചത്. തൂണുകൾക്ക് 14.5 മുതൽ 19 മീറ്റർ വരെ ഉയരമുണ്ട്.
രാജ്യം ഏറെ പ്രതീക്ഷയോടെ കാത്തിരിക്കുന്ന പദ്ധതിയാണ് അഹമ്മദാബാദ് ബുള്ളറ്റ് ട്രെയിൻ. ഇന്ത്യൻ റെയിൽവേയുടെ തന്നെ വിധി മാറ്റിമറിക്കുവാൻ മാത്രം ശക്തമായ ഈ പദ്ധതി യുദ്ധകാലാടിസ്ഥാനത്തിലാണ് മുന്നോട്ട് പോകുന്നത്. മുംബൈ-അഹമ്മദാബാദ് ബുള്ളറ്റ് ട്രെയിൻ പദ്ധതിയുടെ ഭാഗമായി ഗുജറാത്തിലൂടെ 2027 നവംബറോടെ ട്രെയിൻ ഓടിത്തുടങ്ങുമെന്നാണ് പ്രതീക്ഷ.
മണിക്കൂറിൽ 320 കിലോമീറ്ററാണ് വേഗത .ഇടനാഴി പൂർത്തിയാകുന്നതോടെ, മുംബൈയും അഹമ്മദാബാദും തമ്മിലുള്ള ദൂരം രണ്ട് മണിക്കൂറായി കുറയും. 1,08,000 കോടി രൂപയാണ് ഇതിനായി കേന്ദ്രസർക്കാർ മാറ്റിവെച്ചത്. ജപ്പാനുമായി സഹകരിച്ചാണ് പദ്ധതി പൂർത്തിയാക്കുന്നത്.
രാജധാനി, ശതാബ്ദി തുടങ്ങിയ പ്രീമിയം സർവീസുകൾക്ക് പകരമായി സെമി-ഹൈ സ്പീഡ് ട്രെയിനുകൾ ആരംഭിക്കാനും ഇന്ത്യൻ റെയിൽവേ പദ്ധതിയിടുന്നുണ്ട്.
മണിക്കൂറിൽ 250 കിലോമീറ്റർ വേഗതയിൽ ഇവ ഓടിക്കാനാണ് തയ്യാറെടുക്കുന്നത് . 508 കിലോമീറ്റർ ബുള്ളറ്റ് ട്രെയിൻ ഇടനാഴി പുതുതായി ആസൂത്രണം ചെയ്ത സെമി-ഹൈ സ്പീഡ് ട്രെയിനുകളുടെ പരീക്ഷണ കേന്ദ്രമായും പ്രവർത്തിക്കും.
