ന്യൂഡൽഹി: ഹരിയാനയിൽ ബിജെപി ഹാട്രിക് വിജയം ഉറപ്പിച്ചതോടെ ഇത്തവണ ഒറ്റയ്‌ക്ക് മത്സരിച്ച ആം ആദ്മി പാർട്ടിയുടെ സ്ഥിതി ദയനീയമാണ്. ഇതുവരെയും ഒരു സീറ്റിൽ പോലും അക്കൗണ്ട് തുറക്കാൻ അരവിന്ദ് കെജ്‌രിവാളിന്റെ ആംആദ്മിക്കായിട്ടില്ല. ഒരിക്കലും അമിത ആത്മവിശ്വാസം പാടില്ലെന്ന വലിയ പാഠമാണ് ഹരിയാന തെരഞ്ഞെടുപ്പ് നൽകുന്നതെന്നായിരുന്നു ഫലം പുറത്തുവന്ന ശേഷം കെജ്‌രിവാളിന്റെ പ്രതികരണം
ഡൽഹിയിലെ ആംആദ്മി കൗൺസിലർമാരോട് സംസാരിക്കുകയായിരുന്നു അദ്ദേഹം. “ഹരിയാനയിലെ ഫലം നമുക്ക് നോക്കാം. തെരഞ്ഞെടുപ്പുകളിൽ അമിത ആത്മവിശ്വാസം പാടില്ലെന്നതാണ് ഇത് നൽകുന്ന വലിയ പാഠം” കെജ്‌രിവാൾ പറഞ്ഞു. ഹരിയാനയിൽ 9 സീറ്റുകളിൽ മത്സരിക്കാൻ അനുവദിക്കാത്തതിനെ തുടർന്നാണ് ആം ആദ്മി കോൺഗ്രസുമായി സഖ്യമുണ്ടാക്കാതെ ഇത്തവണ ഒറ്റയ്‌ക്ക് മത്സരിച്ചത്. തെരഞ്ഞെടുപ്പിൽ 90 സീറ്റുകളിൽ 89 ലും ആം ആദ്മി സ്ഥാനാർത്ഥികൾ മത്സരിച്ചിരുന്നു. എന്നാൽ ഒരു സീറ്റിൽ പോലും വിജയം കണ്ടെത്താൻ പാർട്ടിക്കായില്ല.
AAP യുടെ പിന്തുണയില്ലാതെ ഒരുപാർട്ടിക്കും ഹരിയാനയിൽ സർക്കാർ രൂപീകരിക്കാനാവില്ലെന്നായിരുന്നു പ്രചാരണവേളയിൽ കെജ്‌രിവാളിന്റെ അവകാശവാദം. ഈ തോൽ‌വിയിൽ നിരാശരായിരിക്കാതെ ഫെബ്രുവരിയിൽ നടക്കാനിരിക്കുന്ന ഡൽഹി നിയമസഭാ തെരഞ്ഞെടുപ്പിനുവേണ്ടിയെങ്കിലും പ്രചാരണം ഊർജ്ജിതമാക്കണമെന്ന് കെജ്‌രിവാൾ കൗൺസിലർമാർക്ക് ഉപദേശം നൽകുകയും ചെയ്തു.
