“
ഇന്റർനെറ്റ് ലോകത്തെ അമ്പരപ്പിച്ചുകൊണ്ട് വൈറലാവുകയാണ് ഒരു ‘കെട്ടിടവീ‍ഡിയോ’. 675 അടി ഉയരത്തിൽ ‘S’ രൂപത്തിൽ പണികഴിപ്പിച്ചിട്ടുള്ള ഈ കെട്ടിടം സോഷ്യൽമീഡിയയിൽ ശ്രദ്ധേയമായത് അവിടെ താമസിക്കുന്നവരുടെ കണക്കുകളിലൂടെയാണ്. എൻജിനീയറിംഗ് അത്ഭുതം എന്ന് വിശേഷിപ്പിക്കാവുന്ന ഈ കെട്ടിടത്തിൽ 39 നിലകളുണ്ട്. ഇവിടെ താമസിക്കുന്നതാകട്ടെ ഇരുപതിനായിരത്തിലധികം ആളുകളും. അവിശ്വസനീയമെന്നും അതിശയോക്തിയെന്നും തോന്നിപ്പിക്കുന്ന ഈ കണക്ക് യഥാർത്ഥ്യമാണ്.
ചൈനയിലെ ക്വിയാഞ്ചിയാംഗ് സെഞ്ചുറി സിറ്റിയിലാണ് ഈ കെട്ടിടം സ്ഥിതിചെയ്യുന്നത്. ആഡംബര ഹോട്ടലായി ആരംഭിച്ചതാണെങ്കിലും ഇത് പിന്നീട് ആഡംബര അപ്പാർട്ട്മെന്റ് കോംപ്ലക്സായി മാറുകയായിരുന്നു. 1.47 മില്യൺ ചതുരശ്ര മീറ്ററിൽ സ്ഥിതിചെയ്യുന്ന കെട്ടിടം 20,000 പേരുടെ വീടാണ്.
കെട്ടിടസമുച്ചയം വിട്ടുപോകാതെ തന്നെ ആവശ്യമായ എല്ലാ സാധനങ്ങളും സേവനങ്ങളും താമസക്കാർക്ക് ലഭിക്കും. ഷോപ്പിംഗ് സെന്ററുകൾ, ഫിറ്റ്നസ് സെന്ററുകൾ, സ്കൂളുകൾ, റെസ്റ്റോറന്റുകൾ, ഹോസ്പിറ്റിലുകൾ, ഇൻഡോർ സ്വിമ്മിംഗ് പൂളുകൾ, ഗ്രോസറി സ്റ്റോറുകൾ, സലൂണുകൾ തുടങ്ങി എല്ലാം ഒരു കുടക്കീഴിൽ തന്നെയുണ്ട്.
ലോകത്തെ ഏറ്റവും വലിയ റെസിഡൻഷ്യൽ ബിൽഡിംഗ് എന്നാണ് ഇത് അറിയപ്പെടുന്നത്. ഈ കെട്ടിടത്തിന് 30,000 പേരെ ഉൾക്കൊള്ളിക്കാനുള്ള ശേഷിയുണ്ടെങ്കിലും 15,000 – 20,000 ആളുകളാണ് ഇതുവരെ താമസിച്ചിട്ടുള്ളത്.
2013ലാണ് ഇത് നിർമിക്കപ്പെട്ടത്. കെട്ടിടത്തിലെ ചെറിയ ഒരു അപ്പാർട്ട്മെന്റിന്റെ പ്രതിമാസ വാടക ഏകദേശം 17,959 രൂപയാണ്. എന്നാൽ ബാൽക്കണി അടക്കമുള്ള വലിയ അപ്പാർട്ട്മെന്റുകൾക്ക് 47,891 രൂപയാണ് പ്രതിമാസവാടക.
