തദ്ദേശസ്വയംഭരണസ്ഥാപനങ്ങളിലെ വാർഡുകളുടെ അതിർത്തികൾ പുനർനിർണയിച്ചു; ഇനി ഡിജിറ്റൽ ഭൂപടം വരും

0

തിരുവനന്തപുരം: തദ്ദേശസ്വയംഭരണസ്ഥാപന തിരഞ്ഞെടുപ്പിനായി സംസ്ഥാനത്തെ വാർഡുകളുടെ അതിർത്തികൾ പുനർനിർണയിച്ചു. തദ്ദേശസ്വയംഭരണസ്ഥാപനങ്ങളിലെ വാർഡുകൾ പുനർനിർണയിക്കുന്നതിനായി സർക്കാർ നേരത്തേ ഡീലിമിറ്റേഷൻ കമ്മീഷന് രൂപം നൽകിയിരുന്നു. വാർഡുകളുടെ അതിർത്തികൾ പുനർനിർണയിച്ചതിന് പിന്നാലെ തദ്ദേശ സ്ഥാപനങ്ങളുടെ ഡിജിറ്റൽ ഭൂപടം തയ്യാറാക്കും. ഇതുൾപ്പെടെയുള്ള സാങ്കേതികസഹായം ലഭ്യമാക്കാൻ ഇൻഫർമേഷൻ കേരള മിഷനെ നോഡൽ ഏജൻസിയായി ചുമതലപ്പെടുത്തി.

ഇൻഫർമേഷൻ കേരള മിഷൻ (ഐകെഎം) തയ്യാറാക്കിയ ക്യു ഫീൽഡ് ആപ്പാണ് ഡിജിറ്റൽ ഭൂപടം തയ്യാറാക്കാൻ ഉപയോഗിക്കുക. ഡീലിമിറ്റേഷൻ നടപടിക്രമങ്ങളും ജി ഐ എസ് അധിഷ്ഠിത വാർഡ് മാപ്പിംഗും പൂർത്തിയായിക്കഴിഞ്ഞാൽ ലഭ്യമായ ഡാറ്റയും മാപ്പുകളും സർക്കാർ ആവശ്യങ്ങൾക്കായി ദ്ദേശസ്വയംഭരണ വകുപ്പിൽ ലഭ്യമാക്കണമെന്നും ഉത്തരവിൽ ചൂണ്ടിക്കാട്ടി.1994ലെ കേരള പഞ്ചായത്തീരാജ് ആക്ട്(1994ലെ13) 10ാംവകുപ്പ് ഒന്നാം ഉപവകുപ്പ് പ്രകാരം തദ്ദേശസ്വയംഭരണസ്ഥാപനങ്ങളിലെ വാർഡുകൾ പുനർനിർണയിക്കുന്നതിനു ഡീലിമിറ്റേഷൻ കമ്മീഷൻ രൂപീകരിച്ചു നേരത്തേ സർക്കാർ ഉത്തരവിട്ടിരുന്നു. തുടർന്ന് നിർദ്ധിഷ്ടവാർഡുകളുടെ അതിർത്തികൾ ഉൾപ്പെടുത്തിയ ദ്ദേശസ്ഥാപനങ്ങളുടെ ഡിജിറ്റൽ ഭൂപടം തയ്യാറാക്കുന്നതിന് ക്യു ഫീൽഡ് ആപ്പ് ഉപയോഗിക്കാനും ആവശ്യമായ സാങ്കേതികസഹായം ലഭ്യമാക്കാനും ഇൻഫർമേഷൻ കേരള മിഷനെ ചുമതലപ്പെടുത്താൻ കമ്മീഷൻ തീരുമാനിക്കുകയും സർക്കാരിനോട് അഭ്യാർഥിക്കുകയും ചെയ്തിരുന്നു. ഇത് പരിശോധിച്ചാണ് ഇപ്പോൾ സർക്കാർ ഉത്തരവിറക്കിയത്.

Leave a Reply