തിരുവനന്തപുരം: വയനാട് ഉരുള്പ്പൊട്ടല് ദുരന്തം കണ്മുന്നില് തീരാനോവായി തുടരുമ്പോഴും പ്രതിച്ഛായ വര്ധിപ്പിക്കാന് ഖജനാവിലെ പണം ധൂര്ത്തടിക്കുന്ന പിണറായി സര്ക്കാരിന്റേത് മനസാക്ഷിയില്ലാത്തതാണെന്ന് കെ പി സി സി പ്രസിഡന്റ് കെ സുധാകരന് എം പി. ദുരിതാശ്വാസ നിധിയിലേക്ക് സംഭാവന ചെയ്യുന്നവരെ പരിഹസിക്കുന്ന നടപടിയാണ് സര്ക്കാരിന്റേതെന്നും സുധാകരന് പറഞ്ഞു.
സംസ്ഥാനത്തിന് പുറമെ ഡല്ഹി, മഹാരാഷ്ട്ര, ആന്ധ്രാപ്രദേശ്, മധ്യപ്രദേശ്, കര്ണാടക എന്നിവിടങ്ങളില് ഉള്പ്പെടെ 100 തിയേറ്ററുകളിലേക്ക് സര്ക്കാരിന്റെ പരസ്യചിത്രം പ്രദര്ശിപ്പിക്കാനാണ് 20 ലക്ഷത്തോളം തുക ഇപ്പോള് അനുവദിച്ചത്.
കേരളീയം, നവകേരളസദസ്സ്,മുഖാമുഖം തുടങ്ങിയ പിആര് വര്ക്കുകള്ക്കായി കോടികള് ചെലവാക്കിയ സര്ക്കാര് വീണ്ടും കേരളീയത്തിനായി പത്തുകോടിയോളം മറ്റിവെച്ചിട്ടുണ്ട്. പിആര് എക്സര്സൈസ് ചെയ്തു പണം പാഴാക്കാതെ ആ തുകയെല്ലാം വയനാട് ജനതയുടെ പുനരധിവാസത്തിന് നീക്കിവെയ്ക്കാനുള്ള മനുഷ്യത്വപരമായ നടപടി സ്വീകരിക്കാന് പിണറായി സര്ക്കാര് തയ്യാറാകണം.കേരള ജനത മുഴുവന് അവരാല് കഴിയുന്ന സഹായം വയനാട്ടിലെ പാവങ്ങളെ സഹായിക്കാനായി സംഭാവന ചെയ്യുമ്പോഴാണ് പിണറായി സര്ക്കാരിന്റെ ഈ തലതിരിഞ്ഞ നടപടിയെന്നും കെ സുധാകരന് പരിഹസിച്ചു.
