ഓടിക്കൊണ്ടിരുന്ന കാറിന് മുകളിലേക്ക് കൂറ്റൻ പാറ അടർന്നു വീണ് ഡ്രൈവർക്ക് ഗുരുതരമായി പരിക്കേറ്റു. ചിന്നക്കനാൽ അപ്പർ സൂര്യനെല്ലി സ്വദേശി ആന്റണി രാജിനാണ് (38) ഗുരുതരമായി പരിക്കറ്റത്. ഇയാളെ ടാറ്റ ഹൈറേഞ്ച് ആശുപത്രിയിൽ പ്രവേശിപ്പിച്ചു. ആന്റണി വിനോദ സഞ്ചാരികളെ ഇറക്കിയ ശേഷം ഉച്ചയൂണ് കഴിക്കാനായി പോകുമ്പോൾ ഒരു കിലോമീറ്റർ ഉയരത്തിലുള്ള മലമുകളിൽ നിന്നു കൂറ്റൻ പാറ അടർന്ന് കാറിന് മുകളിലേക്ക് വീഴുകയായിരുന്നു.
ഇന്നലെ പകൽ 12നു മൂന്നാർ – മറയൂർ റോഡിൽ പെരിയവര ചെക് ഡാമിനു സമീപമായിരുന്നു അപകടം. മലമുകളിൽ നിന്ന് അടർന്നു വീണ കൂറ്റൻ പാറയിൽ നിന്നു തെറിച്ച പാറക്കഷണമാണ് ഓടിക്കൊണ്ടിരുന്ന കാറിനു മുകളിൽ വീണത്. പൂർണമായി തകർന്ന കാറിനുള്ളിൽ അകപ്പെട്ട ആന്റണിയെ സമീപത്തുണ്ടായിരുന്ന വഴിയോരക്കച്ചവടക്കാരൻ ജഗദീഷും വഴിയാത്രക്കാരും ചേർന്ന് കാറിന്റെ വാതിൽ പൊളിച്ചാണ് പുറത്തെടുത്തത്.
ചിന്നക്കനാലിൽ നിന്നുള്ള വിനോദസഞ്ചാരികളെ രാജമല സന്ദർശനത്തിനായി ഇറക്കിയ ശേഷം ഭക്ഷണം കഴിക്കാനായി മൂന്നാറിലേക്കു കാറോടിച്ച് വരികയായിരുന്നു ആന്റണി രാജ്. മുതുവാൻപാറ മലയുടെ മുകളിൽ നിന്നാണ് കൂറ്റൻ പാറ അടർന്നു താഴേക്കു വന്നത്. താഴേക്കു പതിച്ച വലിയ പാറ പ്രധാന റോഡിന്റെ തൊട്ടു മുകളിൽ പതിച്ച ശേഷം അവിടെ നിന്നു തെറിച്ചു റോഡിന്റെ വശത്തെ ടാറിങ് തകർത്ത് സമീപത്തുള്ള പുഴയോരത്തേക്കു പതിച്ചു.
‘മുൻപു സംഭവിച്ച ഉരുൾപൊട്ടലിന്റെ ഭാഗമായി മലമുകളിൽ തങ്ങിക്കിടക്കുന്ന കൂറ്റൻ പാറകൾ കാലക്രമേണ താഴേക്ക് ഉരുണ്ടുവീഴാൻ സാധ്യതയുണ്ട്. മഴമൂലം പാറയുടെ അടിയിൽ സംഭവിക്കുന്ന മണ്ണൊലിപ്പ് ഇതിനു കാരണമാകാറുണ്ട്.’ ഡോ. പി.എസ്.സുനിൽ (അസോഷ്യേറ്റ് പ്രഫസർ, ഡിപ്പാർട്‌മെന്റ് ഓഫ് മറൈൻ ജിയോളജി ആൻഡ് ജിയോഫിസിക്‌സ്, കുസാറ്റ്)