കൊച്ചി: നഗരത്തില് സ്വകാര്യ ടെലികോം കമ്പനിയുടെ കേബിള് വഴിയാത്രക്കാര്ക്ക് അപകടമുണ്ടാക്കുന്ന വിധം താഴ്ന്നുകിടക്കുന്നുണ്ടെങ്കില് ഇവ മുറിച്ചുമാറ്റുന്നതിന് രണ്ടു ദിവസം മുമ്പ് നോട്ടീസ് നല്കണമെന്ന് ഹൈക്കോടതി നിര്ദേശിച്ചു.
എയര്ടെല് കമ്പനി നല്കിയ ഹര്ജിയിലാണ് ജസ്റ്റീസ് ദേവന് രാമചന്ദ്രന് നിര്ദേശം നല്കിയത്. കൊച്ചി നഗരത്തില് വഴിയരികിലെ കേബിളില് കുരുങ്ങി ഇരുചക്ര വാഹനക്കാര്ക്കു പരിക്കേറ്റ സംഭവങ്ങളെത്തുടര്ന്നാണ് ഇത്തരം കേബിളുകള് മുറിച്ചുനീക്കാന് കോടതി ഉത്തരവിട്ടത്.
വൈദ്യുതിപോസ്റ്റിലൂടെ വലിച്ചിട്ടുള്ള കേബിളുകള് പത്തു ദിവസത്തിനകം ടാഗ് ചെയ്യണമെന്നും ഇതു ചെയ്യാത്ത കേബിളുകള് നീക്കം ചെയ്യണമെന്നുമായിരുന്നു സിംഗിള് ബെഞ്ച് ഉത്തരവ്. തുടര്ന്ന് കേബിളുകള് നീക്കം ചെയ്യാന് കെഎസ്ഇബി നടപടി തുടങ്ങിയിരുന്നു. ഈ ഘട്ടത്തിലാണ് എയര്ടെല് കമ്പനി കോടതിയെ സമീപിച്ചത്.
ഹര്ജിക്കാര്ക്കു മാത്രം നോട്ടീസ് നല്കിയാല് മതിയെന്നു വ്യക്തമാക്കിയ സിംഗിള് ബെഞ്ച് അപകടാവസ്ഥയിലുള്ള കേബിളുകള് നീക്കം ചെയ്യുന്ന നടപടിയുമായി മുന്നോട്ടു പോകാനും നിര്ദേശിച്ചു. കമ്പനി കേബിളുകള് സ്ഥാപിക്കുന്ന ജോലികള് ഔട്ട്സോഴ്സ് ചെയ്തിരുന്നെങ്കിലും ഇതു ചെയ്തവര് അശ്രദ്ധമായാണ് കേബിള് സ്ഥാപിച്ചതെന്നും കോടതി വാക്കാല് പറഞ്ഞു.