ആലപ്പുഴ: ഹരിപ്പാട്ട് വഴിവക്കിൽ മാലിന്യം ഉപേക്ഷിച്ചവരെ സാമൂഹ്യമാധ്യമം വഴി കണ്ടെത്തി മാലിന്യം സമ്മാനപ്പൊതിയായി തിരികെ ഏൽപ്പിച്ച് നാട്ടുകാർ.
പള്ളിപ്പാട് ചന്തയ്ക്ക് കിഴക്കുവശമുള്ള റോഡിലാണ് ഉപയോഗം കഴിഞ്ഞ സ്നഗി ഉൾപ്പെടെയുള്ള മാലിന്യങ്ങൾ പെട്ടിയിലാക്കി ഉപേക്ഷിച്ച നിലയിൽ കണ്ടെത്തിയത്. ഈ പെട്ടി തെരുവുനായ്ക്കൾ വലിച്ചുകീറിയപ്പോൾ ഇതിനുള്ളിൽ നിന്ന് ഒരു കൊറിയർ കവർ ലഭിച്ചു.
കൊറിയറിലെ വിലാസം പകർത്തി നാട്ടുകാർ സാമൂഹ്യമാധ്യമങ്ങൾ വഴി നടത്തിയ അന്വേഷണത്തിൽ എരമത്തൂർ സ്വദേശികളാണ് മാലിന്യം ഉപേക്ഷിച്ചതെന്ന് കണ്ടെത്തി. തുടർന്ന് നാട്ടുകാർ ഇവരെ മാലിന്യം ഉപേക്ഷിച്ച സ്ഥലത്തേക്ക് വിളിച്ചു വരുത്തി “വസ്തുവകകൾ’ സമ്മാനപ്പൊതിയാക്കി കൊടുത്തുവിട്ടു.
മാലിന്യം വഴിയിൽ ഉപേക്ഷിച്ചവർക്കെതിരെ പോലീസും ആരോഗ്യ വകുപ്പും കേസെടുത്തു