ഡിവൈഎഫ്‌ഐ സംസ്ഥാന കമ്മിറ്റിയംഗത്തിനെതിരെ യൂത്ത് കോൺഗ്രസ് നേതാക്കളുടെ ആക്രമണം എന്ന് ആരോപണം. സംസ്ഥാന കമ്മറ്റി അംഗം ബി അനൂപിനെയാണ് സംഘടിച്ചെത്തിയ യൂത്ത് കോൺഗ്രസ് പ്രവർത്തകർ മാരകായുധങ്ങളുമായി ആക്രമിച്ചത്. ഇന്നലെ രാത്രി 11 മണിയോടെ ഇടുക്കി ഏലപ്പാറയിലായിരുന്നു സംഭവം.
കമ്പിവടി കൊണ്ടുള്ള അടിയിൽ തലയ്ക്ക് ഗുരുതര പരുക്കേറ്റ അനൂപിനെ പീരുമേട് താലൂക്ക് ആശുപത്രിയിൽ പ്രവേശിപ്പിച്ചു. ഡിവൈഎഫ്‌ഐ ജില്ലാ ട്രഷറർ കൂടിയായ അനൂപിന്റെ നേതൃത്വത്തിൽ ലഹരി മാഫിയെക്കെതിരെ സംഘടിപ്പിച്ച ക്യാമ്പയിനുകളുമായി ബന്ധപ്പെട്ട തർക്കങ്ങളാണ് അക്രമത്തിൽ കലാശിച്ചതെന്ന് ഡിവൈഎഫ്‌ഐ നേതാക്കൾ പറഞ്ഞു.
കഞ്ചാവ് മാഫിയയെ സംരക്ഷിക്കുന്ന പ്രാദേശിക യൂത്ത് കോൺഗ്രസ് നേതാക്കളാണ് അക്രമത്തിന് നേതൃത്വം നൽകിയതെന്നും ഇവർക്കെതിരെ കർശന നടപടികൾ സ്വീകരിക്കണമെന്നും ജില്ലാ സെക്രട്ടറി രമേശ് കൃഷ്ണൻ ആവശ്യപ്പെട്ടു. സംഭവത്തിൽ പീരുമേട് പൊലീസ് കേസെടുത്ത് നടപടികൾ ആരംഭിച്ചു.