ദുബായ് : ദുബായിയിൽ ഭക്ഷണ വിതരണ സേവനങ്ങൾ നൽകുന്നതിനായി ഇനി റോബോട്ടുകളുണ്ടാകും. അന്തരീക്ഷ മലിനീകരണം പൂർണ്ണമായും ഒഴിവാക്കുന്നതും, ഡ്രൈവർ ഇല്ലാത്ത സ്മാർട്ട് ഗതാഗത സംവിധാനങ്ങൾ പ്രോത്സാഹിപ്പിക്കുന്നതും ലക്ഷ്യമിട്ടാണ് ഫുഡ് ഡെലിവറി മേഖലയിൽ “റ്റലാബോട്സ്” എന്ന പേരിലുള്ള ഈ റോബോട്ടുകളെ അവതരിപ്പിക്കുന്നത്.
ദുബായ് റോഡ്സ് ആൻഡ് ട്രാൻസ്‌പോർട്ട് അതോറിറ്റി ദുബായ് ഇന്റഗ്രേറ്റഡ് ഇക്കണോമിക് സോൺസ് അതോറിറ്റി, തലബാത് യുഎഇ എന്നിവർ സംയുക്തമായാണ് ഈ പദ്ധതി നടപ്പിലാക്കുന്നത്. സ്വയം പ്രവർത്തിക്കുന്ന റോബോട്ടുകൾ ഉപയോഗിച്ചുള്ള ഈ ഭക്ഷണവിതരണ പദ്ധതിയുടെ പ്രാരംഭഘട്ടം ദുബായ് സിലിക്കൺ ഒയാസിസിൽ ആരംഭിച്ചു.
ഉപഭോക്താക്കളിൽ നിന്നുള്ള ഭക്ഷണ ഓർഡറുകൾ അനുസരിച്ച്, ഈ പദ്ധതിയുടെ ഭാഗമായുള്ള, സെഡർ വില്ലാ റെസിഡന്റ്‌സ് പരിസരത്തെ റസ്റ്ററന്റുകളിൽ നിന്ന് ഭക്ഷണസാധനങ്ങൾ എടുത്ത ശേഷം അവ ഉപഭോക്താവിന്റെ വീട്ടുപടിക്കൽ എത്തിച്ച് നൽകുന്ന രീതിയിലാണ് ഈ റോബോട്ടുകൾ പ്രവർത്തിക്കുന്നത്. ഉപഭോക്താക്കൾക്ക് തലബാത് ആപ്പിലൂടെ റോബോട്ടിന്റെ ഭക്ഷണവുമായുള്ള സഞ്ചാരം നിരീക്ഷിക്കാവുന്നതാണ്. ഈ റോബോട്ടുകൾ ഉപഭോക്താവിന്റെ വീടിനരികിൽ എത്തുന്നതോടെ പ്രത്യേക നോട്ടിഫിക്കേഷൻ ലഭിക്കുന്നതാണ്.
പതിനഞ്ച് മിനിറ്റിനകം ഫുഡ് ഡെലിവറി ഉറപ്പ് വരുത്തുന്ന രീതിയിലാണ് പ്രാരംഭഘട്ടത്തിൽ ഇവ പ്രവർത്തിക്കുന്നത്. നിർമ്മിതബുദ്ധിയുടെ സഹായത്തോടെ പ്രവർത്തിക്കുന്ന ഈ റോബോട്ടുകളിൽ ഭക്ഷണം ഓർഡർ ചെയ്യുന്ന വ്യക്തിയുടെ സ്വകാര്യത സംരക്ഷിക്കുന്നതിനുള്ള സാങ്കേതികവിദ്യകൾ ഉൾപ്പെടുത്തിയിട്ടുണ്ട്. ഈ റോബോട്ടുകളിൽ വ്യക്തികളുടെ മുഖം അവ്യക്തതയോടെ മാത്രമാണ് രേഖപ്പെടുത്തുന്നത്. ഈ റോബോട്ടുകളിൽ ഫേഷ്യൽ ഡിറ്റക്ഷൻ സാങ്കേതികവിദ്യകൾ പൂർണ്ണമായും ഒഴിവാക്കിയിട്ടുണ്ട്.
ഈ റോബോട്ടുകൾ അവ സഞ്ചരിക്കുന്ന വഴിയിലെ മതിലുകൾ ഉൾപ്പടെയുള്ള പ്രതിബന്ധങ്ങൾ കണ്ടെത്തുന്നതിനും, ചെറിയ കുട്ടികൾക്കും, വളർത്ത് മൃഗങ്ങൾക്കും ബുദ്ധിമുട്ടുകൾ ഉണ്ടാകാതിരിക്കുന്നതിനും വിവിധ സെൻസറുകളുടെയും, അത്യാധുനിക അൽഗോരിതങ്ങളുടെയും സഹായം പ്രയോജനപ്പെടുത്തുന്നു.
പ്രാരംഭഘട്ടത്തിൽ ദുബായ് സിലിക്കൺ ഒയാസിസിലെ സെഡർ വില്ലാ റെസിഡന്റ്‌സ് മേഖലയ്ക്കകത്ത് മൂന്ന് റോബോട്ടുകളെ ഭക്ഷ്യവിതരണ സേവനങ്ങൾക്കായി വിന്യസിക്കുന്നതാണ്. സെഡർ ഷോപ്പിംഗ് സെന്ററിലെ ലോഞ്ചിങ്ങ് പോയിന്റിൽ നിന്ന് ആരംഭിക്കുന്ന രീതിയിൽ 3 കിലോമീറ്റർ പരിധിയിലാണ് ഈ റോബോട്ടുകൾ ഭക്ഷണം വിതരണം ചെയ്യുന്നത്
