ന്യൂഡല്ഹി: ലുധിയാനയിലെ കോടതി സമുച്ചയത്തിലുണ്ടായ സ്ഫോടനത്തിന്റെ മുഖ്യ ആസൂത്രകന് ഹര്പ്രീത് സിംഗ് പിടിയില്. ഡല്ഹി ഇന്ദിരാ ഗാന്ധി വിമാനത്താവളത്തില്വച്ചാണ് ഇയാളെ എന്ഐഎ അറസ്റ്റ് ചെയ്തത്.
മലേഷ്യയില്നിന്ന് ഡല്ഹിയിലേക്കു വന്ന ഇയാള് വിമാനമിറങ്ങിയതിന് തൊട്ടുപിന്നാലെ എന്ഐഎ കസ്റ്റഡിയിലെടുക്കുകയായിരുന്നു. ഹാപ്പി മലേഷ്യ എന്ന് അറിയപ്പെടുന്ന ഇയാള് പഞ്ചാബിലെ അമൃത്സറിലാണ് താമസിക്കുന്നത്.
പാക് കേന്ദ്രീകൃതമായി പ്രവര്ത്തിക്കുന്ന ഇന്റര്നാഷണല് സിഖ് യൂത്ത് ഫെഡറേഷന് എന്ന സംഘടനയുടെ തലവനായ ലഖ്ഭീര് സിങ് റോഡെയുടെ സഹായിയാണ് ഹര്പ്രീത് സിങ്. ലുധിയാന സേ്ഫോടനത്തില് റോഡെയുടെ പ്രധാന സഹായിയായിരുന്നു ഇയാള്. ഹര്പ്രീതിനെക്കുറിച്ച് എന്തെങ്കിലും വിവരം നല്കുന്നവര്ക്ക് എന്ഐഎ പത്ത് ലക്ഷം രൂപ പ്രതിഫലം പ്രഖ്യാപിച്ചിരുന്നു.
കഴിഞ്ഞ ഡിസംബര് 23നാണ് ലുധിയാനയിലെ കോടതിസമുച്ചയത്തില് സ്ഫോടനമുണ്ടായത്. സംഭവത്തില് ഒരാള് കൊല്ലപ്പെടുകയും അഞ്ച് പേര്ക്ക് പരിക്കേല്ക്കുകയും ചെയ്തു.
2021 ഡിസംബര് 21നാണ് സംഭവത്തില് പോലീസ് കേസ് രജിസ്റ്റര് ചെയ്തത്. കഴിഞ്ഞ ജനുവരി ഒന്നിന് കേസ് എന്ഐഎ ഏറ്റെടുത്തു.