കണ്ണൂര്‍: ദുരൂഹസാഹചര്യത്തില്‍ ജീവനൊടുക്കിയ കാടുവെട്ടു തൊഴിലാളിയായ യുവാവിന്റെ മരണത്തിനുത്തരവാദിയെന്നു ഭാര്യയും ബന്ധുക്കളും ആരോപിച്ച സി.പി.എം. പ്രാദേശിക നേതാവിനെ പോലീസ്‌ അറസ്‌റ്റു ചെയ്തു. കണ്ണൂര്‍ കേളകം അടയ്‌ക്കാത്തോട്ടിലെ പുലിയിളക്കല്‍ സന്തോഷി(39) ന്റെ ദുരൂഹമരണത്തിലാണ്‌ സി.പി.എം. മുട്ടുമാറ്റി ബ്രാഞ്ച്‌ സെക്രട്ടറി ജോബിന്‍ ചോനാട്ടിനെ കേളകം പോലീസ്‌ അറസ്‌റ്റ്‌ ചെയ്‌തത്‌. ആത്മഹത്യാ പ്രേരണാകുറ്റമാണ്‌ ഇയാള്‍ക്കെതിരേ ചുമത്തിയിട്ടുള്ളത്‌.
നവംബര്‍ 27-ന്‌ ആളൊഴിഞ്ഞ പറമ്പില്‍ സന്തോഷിനെ ജീവനൊടുക്കിയ നിലയില്‍ കണ്ടെത്തുകയായിരുന്നു. വഴി തടസപ്പെടുത്തിയ തര്‍ക്കത്തില്‍ ജോബിന്റെ നേതൃത്വത്തില്‍ ഒരുസംഘമാളുകള്‍ സന്തോഷിനെ മര്‍ദ്ദിച്ചതായി ഭാര്യ സുദിനയും ബന്ധുക്കളും കേളകം പോലീസില്‍ പരാതി നല്‍കിയിരുന്നു. അക്രമിക്കപ്പെട്ടതിനു ശേഷം ആശുപത്രിയിലേക്ക്‌ പോയ സന്തോഷ്‌ പിന്നീട്‌ വീട്ടിലേക്ക്‌ തിരിച്ചുവന്നില്ല.
തുടര്‍ന്നു ഭാര്യ ഫോണില്‍ വിളിച്ചപ്പോള്‍ ജോബിനുമായുള്ള തര്‍ക്കം ഒത്തുതീര്‍പ്പാക്കാന്‍ പോയതാണെന്ന്‌ സന്തോഷ്‌ പറഞ്ഞിരുന്നു. തര്‍ക്കം ഒത്തുതീര്‍പ്പാക്കാന്‍ പോയി എന്നുപറഞ്ഞതിനു തൊട്ടടുത്ത ദിവസമാണ്‌ സന്തോഷിനെ മരിച്ച നിലയില്‍ കണ്ടെത്തിയത്‌. ഇതോടെ സന്തോഷിന്റെ മരണം കൊലപാതകമാണെന്ന ആരോപണവുമായി ഭാര്യയും ബന്ധുക്കളും പരസ്യമായി രംഗത്തു വന്നത്‌. മരണത്തില്‍ ദുരൂഹതയുണ്ടെന്നും സത്യസന്ധമായ അന്വേഷണം നടത്തി യഥാര്‍ഥ്യം പുറത്തു കൊണ്ടുവരണമെന്നുമാവശ്യപ്പെട്ട്‌ മുഖ്യമന്ത്രിക്കും ജില്ലാ പോലീസ്‌ മേധാവിക്കും ഭാര്യ സുദിനയും ബന്ധുക്കളും പരാതി നല്‍കിയിരുന്നു. മരത്തില്‍ തൂങ്ങിമരിച്ച നിലയില്‍ കണ്ടെത്തിയ സന്തോഷിന്റെ ദേഹത്തെ മുറിവുകള്‍ അതിക്രൂരമായ മര്‍ദ്ദനമേറ്റതിന്റെ തെളിവാണെന്നും കൊലപാതകമാണെന്നു സംശയിക്കുന്നതായും ഇവര്‍ നല്‍കിയ പരാതിയില്‍ ചൂണ്ടിക്കാട്ടിയിരുന്നു. കഴിഞ്ഞ ഞായറാഴ്‌ചയാണ്‌ ബന്ധുവീട്ടില്‍ നിന്നും രണ്ടുകിലോമീറ്റര്‍ അകലെ സന്തോഷിനെ തുങ്ങിമരിച്ച നിലയില്‍ കണ്ടെത്തിയത്‌.
വെളളിയാഴ്‌ച്ച രാത്രിയാണ്‌ കേസിനാസ്‌പദമായ സംഭവം നടക്കുന്നത്‌. കാടുവെട്ടല്‍ യന്ത്രം നന്നാക്കി കേളകത്തു നിന്നും അടയ്‌ക്കാത്തോട്ടിലെ വീട്ടിലേക്ക്‌ ഇരുചക്രവാഹനത്തില്‍ വരുന്ന വഴി പാറത്തോട്ടില്‍വച്ചു ഒരു സംഘമാളുകള്‍ തന്നെ മര്‍ദ്ദിച്ചതായി സന്തോഷ്‌ ഭാര്യയോടുപറഞ്ഞിരുന്നു.
റോഡില്‍ വഴിയാത്രക്കാര്‍ക്ക്‌ തടസമായി ഇരുന്നവരോട്‌ മാറാന്‍ സന്തോഷ്‌ ആവശ്യപ്പെട്ടിരുന്നു. മാറാത്തതിനെത്തുടര്‍ന്ന്‌ ഇവരുമായി നടത്തിയ വാക്കേറ്റമാണ്‌ മര്‍ദ്ദനകാരണമായി സന്തോഷ്‌ പറഞ്ഞത്‌. സി.പി.എം. ബ്രാഞ്ച്‌ സെക്രട്ടറി ജോബിനടക്കം അഞ്ചംഗ സംഘമാണ്‌ ആക്രമിച്ചതെന്നു സന്തോഷ്‌ പറഞ്ഞിരുന്നതായി ഭാര്യ വെളിപ്പെടുത്തിയിരുന്നു.
കേളകം പോലീസില്‍ പരാതിപ്പെട്ടാല്‍ തിക്‌തഫലം അനുഭവിക്കുമെന്ന്‌ ഇവര്‍ സന്തോഷിനെ ഭീഷണിപ്പെടുത്തിയതായി സുദിന പറയുന്നു. അക്രമത്തില്‍ സന്തോഷിന്റെ കണ്ണൂകള്‍ക്ക്‌ സാരമായി പരുക്കേറ്റിരുന്നു. ശനിയാഴ്‌ച രാവിലെ ആശുപത്രിയില്‍ കാണിച്ചു മരുന്ന്‌ വാങ്ങാനായി കേളകത്തേക്കു പോയ സന്തോഷ്‌ പിന്നീട്‌ തിരികെ വീട്ടിലെത്തിയിട്ടില്ല. ഇതിനിടെയില്‍ പലരും ഒത്തുതീര്‍പ്പിനായി വിളിച്ചിരുന്നുവെന്നും സുദിന പറയുന്നു.
സംഭവം നടന്നതിന്റെ പിറ്റേ ദിവസമായ ശനിയാഴ്‌ച വൈകുന്നേരം അഞ്ചുമണിവരെ സന്തോഷ്‌ ഫോണില്‍ സംസാരിച്ചുവെന്നുവെങ്കിലും പിന്നീട്‌ സ്വിച്ച്‌ ഓഫാവുകയായിരുന്നുവെന്നും ഇവര്‍ പറയുന്നു. രാത്രിയോടെ സന്തോഷിനെ കാണാതായതിനെത്തുടര്‍ന്ന്‌ കേളകം പോലീസ്‌ സേ്‌റ്റഷനില്‍ പരാതി നല്‍കി. ശനിയാഴ്‌ച രാത്രിയിലും ഞായറാഴ്‌ചയും നാട്ടുകാരും ബന്ധുക്കളും നടത്തിയ തെരച്ചിലിനൊടുവിലാണ്‌ മൃതദേഹം കണ്ടെത്തിയത്‌. യാതൊരുകാരണവാശാലും ഭര്‍ത്താവ്‌ ആത്മഹത്യ ചെയ്ിയല്ലെന്നും വെളളിയാഴ്‌ച്ച മര്‍ദ്ദിച്ച സംഘവുമായി ഒത്തുതീര്‍പ്പിനായി പോയ സന്തോഷിനെ ശനിയാഴ്‌ച വീണ്ടും മര്‍ദ്ദിച്ചു കൊലപ്പെടുത്തി കെട്ടിതൂക്കിയാതാകാമെന്നാണ്‌ ഭാര്യയും ബന്ധുക്കളും ആരോപിക്കുന്നത്‌. ഭാര്യയും രണ്ടുമക്കളും അടങ്ങുന്ന കുടുംബത്തിന്റെ ഏക ആശ്രയമായിരുന്നു സന്തോഷ്‌.
ഭര്‍ത്താവിന്റെ ദുരൂഹമരണത്തിന്‌ ഉത്തരവാദികളായവരെ കണ്ടെത്തണമെന്നു ആവശ്യപ്പെട്ടു സുദിന നടത്തിയ പോരാട്ടത്തിനൊടുവിലാണ്‌ സി.പി.എം. പ്രാദേശിക നേതാവ്‌ ജോബിന്‍ അറസ്‌റ്റിലാകുന്നത്‌. ഈയാള്‍ക്കൊപ്പം സന്തോഷിനെ മര്‍ദ്ദിച്ച അഞ്ചുപേരെ തിരിച്ചറിഞ്ഞതായും ഇവര്‍ക്കായി അന്വേഷണമാരംഭിച്ചിട്ടുണ്ടെന്നും ഉടന്‍ അറസ്‌റ്റു ചെയ്യുമെന്നും പോലീസ്‌ പറയുന്നു. സി.പി.എം. മുട്ടുമാറ്റി ബ്രാഞ്ച്‌ സെക്രട്ടറിയായ ജോബിന്‍ ചോനാട്ടിനെ അറസ്‌റ്റു ചെയ്യാന്‍ പരാതിയുണ്ടായിട്ടും തുടക്കത്തില്‍ പോലീസ്‌ തയാറായിരുന്നില്ല. ഈയാളുടെ രാഷ്ട്രീയ സ്വാധീനമാണ്‌ പോലീസിനെ പിന്തിരിപ്പിച്ചത്‌. എന്നാല്‍ സുദിന മാധ്യമങ്ങളെ കണ്ട്‌ കാര്യങ്ങള്‍ വിശദീകരിച്ചതോടെയാണ്‌ അറസ്‌റ്റിനു പോലീസ്‌ തയാറായത്‌. പ്രതിയെ ചോദ്യം ചെയ്യലിനു ശേഷം കോടതിയില്‍ ഹാജരാക്കി റിമാന്‍ഡ്‌ ചെയ്തു.
