ഹിന്ദി അടിച്ചേൽപ്പിക്കാൻ ശ്രമം: ബ്രിട്ടാസിന്‍റെ പ്രസംഗം വൈറൽ, പങ്കുവച്ച് ഉലകനായകൻ
ന്യൂഡൽഹി: ഹിന്ദി അടിച്ചേൽപിക്കാൻ കേന്ദ്രസർക്കാർ ആസൂത്രിത ശ്രമങ്ങൾ നടത്തുന്നതായി ആരോപിച്ച് രാജ്യസഭയിൽ ജോൺ ബ്രിട്ടാസ് എംപി നടത്തിയ പ്രസംഗം വൈറൽ. നടനും മക്കള്‍ നീതി മയ്യം നേതാവുമായ കമല്‍ഹാസനും ബിആർഎസ് സോഷ്യല്‍ മീഡിയ കണ്‍വീനറുമായ വൈ.സതീഷ് റെഡ്ഡിയും അടക്കമുള്ള നേതാക്കൾ പ്രസംഗം സമൂഹമാധ്യമങ്ങളിൽ പങ്കുവച്ചതോടെയാണ് വൈറലായത്.
ഇവര്‍ റീട്വീറ്റ് ചെയ്ത, ബ്രിട്ടാസിന്‍റെ പ്രസംഗ വീഡിയോ ഇതിനകം തന്നെ നിരവധി പേരാണ് കണ്ടത്. രാജ്യസഭയില്‍ ശൂന്യവേളയിലാണ് ഹിന്ദിയെ ഏക ദേശീയഭാഷയായി ഉയര്‍ത്താന്‍ ഗൂഢശ്രമങ്ങള്‍ നടക്കുന്നതായി ജോൺ ബ്രിട്ടാസ് കുറ്റപ്പെടുത്തിയത്. ഇതിന്‍റെ വീഡിയോ തമിഴ്, തെലുഗു ഭാഷകളിലുള്ള കുറിപ്പുകള്‍ക്കൊപ്പം ബ്രിട്ടാസ് ട്വീറ്റ് ചെയ്തിരുന്നു. ഇതാണ് വൈ. സതീഷ് റെഡ്ഡി, കമല്‍ഹാസന്‍ അടക്കമുള്ളവര്‍ റീ ട്വീറ്റ് ചെയ്തത്.
