കൊച്ചി: കുന്നത്തുനാട്ടില്‍ വീണ്ടും ട്വന്‍റി ട്വന്‍റിയും-സിപിഎമ്മും തമ്മിലുള്ള പോര് മുറുകുന്നു. ഐക്കരനാട്, കുന്നത്തുനാട് പഞ്ചായത്തുകളില്‍ നടന്ന രണ്ട് പരിപാടികളില്‍ കുന്നത്തുനാട് എംഎല്‍എ പി.വി.ശ്രീനിജനെ ട്വന്‍റി ട്വന്‍റിയുടെ പഞ്ചായത്തംഗങ്ങള്‍ ബഹിഷ്‌കരിച്ചു.
കൃഷിവകുപ്പ് സംഘടിപ്പിച്ച പരിപാടിയിലാണ് നാടകീയ രംഗങ്ങള്‍ അരങ്ങേറിയത്.ഐക്കരനാട്ടിലെ പരിപാടിയില്‍ എംഎല്‍എ വേദിയിലേക്ക് കയറി വന്നയുടനെ പഞ്ചായത്ത് പ്രസിഡന്‍റും, വൈസ് പ്രസിഡന്‍റും അടക്കമുള്ളവര്‍ വേദിയില്‍ നിന്ന് ഇറങ്ങിപ്പോയി.
കുന്നത്തുനാട്ടിലെ പരിപാടിയില്‍ പഞ്ചായത്ത് പ്രഡിഡന്‍റും മെംബറുമാരും എംഎല്‍എ ഇരിക്കുന്ന വേദിയിലേയ്ക്ക് കയറാന്‍ തയാറായില്ല. ഇവരെ വേദിയിലേക്ക് കയറാന്‍ ക്ഷണിച്ചപ്പോള്‍ പഞ്ചായത്ത് പ്രസിഡന്‍റ് വേദിയില്‍ കയറി പ്രതിഷേധിച്ചു. ഇതേചൊല്ലി പ്രവർത്തകർ തമ്മിൽ വാക്‌പോരും, നേരിയ സംഘര്‍ഷവുമുണ്ടായി.
പാര്‍ട്ടിയോടുള്ള എംഎല്‍എയുടെ നിസഹകരണത്തിലുള്ള പ്രതിഷേധമാണ് അറിയിച്ചതെന്നാണ് ട്വന്‍റി ട്വന്‍റിയുടെ വിശദീകരണം. ട്വന്‍റി ട്വന്‍റി ഭരിക്കുന്ന പഞ്ചായത്തുകളില്‍ തന്നെ വിലക്കിയിരിക്കുകയാണെന്ന് എംഎല്‍എ പ്രതികരിച്ചു.
