വിദേശകാര്യ നയങ്ങളിൽ ഇന്ത്യ സ്വീകരിക്കുന്ന സ്വതന്ത്ര നിലപാടുകളെ പുകഴ്ത്തി പാക്കിസ്ഥാൻ മുൻ പ്രധാനമന്ത്രി ഇമ്രാൻ ഖാൻ.
ലാഹോറിൽ നടന്ന പൊതുസമ്മേളനത്തിൽ വച്ചാണ് ഖാൻ ഇന്ത്യൻ നയങ്ങളെ പുകഴ്ത്തിയത്. അമേരിക്കയുടെ ഉപരോധ ആഹ്വാനങ്ങൾക്ക് വഴങ്ങാതെ റഷ്യൻ എണ്ണ വാങ്ങുന്നത് തുടരാൻ ഇന്ത്യ കാണിച്ച ആർജവം പ്രശംസനീയമെന്ന് അദേഹം പറഞ്ഞു.
ഷഹബാസ് ഷെറീഫിന്റെ നേതൃത്വത്തിലുള്ള പാക്ക് സർക്കാരിനെ വിമർശിക്കുന്ന വേളയിലാണ് ഈ പരാമർശങ്ങൾ. റഷ്യയുടെ പക്കൽ നിന്ന് എണ്ണ വാങ്ങുന്നത് തുടരുമെന്ന് പ്രഖ്യാപിക്കുന്ന ഇന്ത്യൻ വിദേശകാര്യ മന്ത്രി എസ്.ജയശങ്കറുടെ വീഡിയോയും വേദിയിൽ അദേഹം പ്രദർശിപ്പിച്ചു.
പ്രധാനമന്ത്രി സ്ഥാനം നഷ്ടമായതിന് ശേഷം പാക്ക് സർക്കാരിനെ വിമർശിക്കവേ ഇത് രണ്ടാം തവണയാണ് ഖാൻ ഇന്ത്യൻ വിദേശകാര്യ നയങ്ങളെ പുകഴ്ത്തുന്നത്.