ന്യൂഡൽഹി: ഇഡിയുടെ വിശാല അധികാരങ്ങൾ ശരിവച്ച ഉത്തരവ് ഭാഗികമായി പുനഃപരിശോധിക്കുമെന്ന് സുപ്രീംകോടതി.
അന്വേഷണത്തിന്റെ ഭാഗമായി ഇഡി തയാറാക്കുന്ന പ്രഥമവിവര റിപ്പോർട്ട് ആരോപണം നേരിടുന്ന വ്യക്തിക്കോ പ്രതിക്കോ നൽകേണ്ടതില്ല, ആരോപണ വിധേയനല്ല എന്നു തെളിയിക്കേണ്ടത് കേസ് നേരിടുന്ന വ്യക്തിയുടെ ഉത്തരവാദിത്തമാണ് തുടങ്ങിയ നിയമത്തിലെ വ്യവസ്ഥകളാകും പുനഃപരിശോധിക്കുക. കോണ്ഗ്രസ് നേതാവ് കാർത്തി ചിദംബരം നൽകിയ ഹർജിയിലാണ് സുപ്രീംകോടതി നിലപാട്.
കള്ളപ്പണമോ കള്ളപ്പണം വെളുപ്പിക്കലോ തടയുന്നതിനെ പൂർണമായും പിന്തുണയ്ക്കുന്നതായും കോടതി അറിയിച്ചു. കേസ് നാലാഴ്ചയ്ക്കുശേഷം വീണ്ടും പരിഗണിക്കും.