മുംബൈ: മഹാരാഷ്ട്രയില്‍ ശിവസേനാ നേതാവ് ഉദ്ധവ് താക്കറെയ്ക്ക് സുപ്രീംകോടതിയില്‍ തിരിച്ചടി. സര്‍ക്കാര്‍ രൂപീകരണവുമായി ബന്ധപ്പെട്ട ഹര്‍ജികള്‍ പരിഗണിക്കുന്നതിന് സമയമെടുക്കുമെന്ന് കോടതി പറഞ്ഞു. കോടതി വിധി വരുന്നതുവരെ സ്പീക്കര്‍ ഒരു തീരുമാനവും എടുക്കരുതെന്നും കോടതി നിര്‍ദേശിച്ചു.
വിമത നേതാവ് ഏക്‌നാഥ് ഷിന്‍ഡെയെ സര്‍ക്കാരുണ്ടാക്കാന്‍ ക്ഷണിച്ച ഗവര്‍ണറുടെ നടപടിക്കെതിരെ താക്കറെ പക്ഷം നല്‍കിയ ഹര്‍ജി പരിഗണിക്കുന്നതിനിടെയാണ് കോടതി പരാമര്‍ശം. എംഎല്‍എമാരെ അയോഗ്യരാക്കിയതു സംബന്ധിച്ച ഹര്‍ജി ചൊവ്വാഴ്ച പരിഗണിക്കണമെന്നു താക്കറെ പക്ഷം കോടതിയില്‍ ആവശ്യമുന്നയിച്ചു.
എന്നാല്‍ ചൊവ്വാഴ്ച കേസ് പരിഗണിക്കാന്‍ കഴിയില്ലെന്ന് കോടതി പറഞ്ഞു. ഭരണഘടനാ ബെഞ്ച് രൂപീകരിച്ചു വേണം ഹര്‍ജി പരിഗണിക്കാനെന്നും ഇതിനു സമയമെടുക്കുമെന്നും കോടതി പറഞ്ഞു. കേസില്‍ അന്തിമ വിധി വരുന്നതുവരെ ഒരു തീരുമാനവും എടുക്കരുതെന്നും കോടതി സ്പീക്കര്‍ക്ക് നിര്‍ദേശം നല്‍കി.
