ഹാമിൽട്ടണ്: ഏകദിന വനിതാ ലോകകപ്പിൽ ഇന്ത്യ ബംഗ്ലാദേശിനെ 110 റണ്സിന് തോൽപ്പിച്ചു. ജയത്തോടെ പോയിന്റ് പട്ടികയിൽ ഇന്ത്യ മൂന്നാം സ്ഥാനത്തേക്ക് ഉയർന്നു. ആറ് കളികളിൽ നിന്ന് മൂന്ന് ജയവുമായി ആറ് പോയിന്റാണ് ഇന്ത്യയുടെ സമ്പാദ്യം. ഓസ്ട്രേലിയ, ദക്ഷിണാഫ്രിക്ക ടീമുകളാണ് യഥാക്രമം ഒന്നും രണ്ടും സ്ഥാനങ്ങളിൽ.
ടോസ് നേടിയ ബാറ്റിംഗിനിറങ്ങിയ ഇന്ത്യ നിശ്ചിത ഓവറിൽ ഏഴ് വിക്കറ്റിന് 229 റണ്സ് നേടി. യാസ്തിക ഭാട്ടിയ (50), ഷഫാലി വർമ (42) എന്നിവരാണ് ഇന്ത്യയുടെ ഇന്നിംഗ്സിന് നട്ടെല്ലായത്. സ്മൃതി മന്ദാനയും പൂജ വസ്ത്രാക്കറും 30 വീതം റണ്സ് നേടി. സ്നേഹ റാണ 27 റണ്സും റിച്ച ഗോഷ് 26 റണ്സും നേടി. ബംഗ്ലാദേശിനായി റിറ്റു മോനി മൂന്ന് വിക്കറ്റ് വീഴ്ത്തി.
230 റണ്സ് വിജയലക്ഷ്യം പിന്തുടർന്ന ബംഗ്ലാദേശ് ഒരുഘട്ടത്തിലും ജയപ്രതീക്ഷ ഉണർത്തിയില്ല. നാല് വിക്കറ്റ് നേടിയ സ്നേഹ റാണയാണ് ബംഗ്ലാദേശിനെ പിടിച്ചുകെട്ടിയത്. ജുലൻ ഗോസ്വാമിയും പൂജ വസ്ത്രാക്കറും രണ്ടു വീതം വിക്കറ്റുകൾ നേടി.